الزوجة التانيه ......

انا عايزة اعرض موضوع عليكو وهو الزوجة التانيه
ليه كل الرجاله بلا استثناء عايزة تتجوز تاني
واللي مبيفكرش دلوقتي بيفكر بعدين
معقوله كل الستات وحشين
معقوله كل الرجاله مظلومين
لو تشوفو الواحد كل شويه يجيله عريس فيه كل المواصفات وبعدين اصلك هتكوني الزوجة التانيه ان مكانتش التالتة
والكل بيشكي مر الشكوه من مراتتهم ولو كلمتم مراتتهم تلاقيهم بيشتكو مر الشكوه من الرجاله
يعني ايه
الراجل لما يزعل من مراته مثلا يجري على الجواز التاني
طيب الست اما تزعل من جوزها تعمل ايه
وانا عارفة ان معظمكم هيتكمسك بالشرع
بس الشرع مقلكش انك تفوت كل حاجة وتمسك في ديا
يعني انا عندي واحده صحبتي جدا اكتشفت ان جوزها عامل معاها مشاكل وكمان بياول يقنعني اني ابقى زوجة تانيه مع صحبة العمر ويقولي دا هيقرب بينا اكتر
ويعني مفيش واحدة من اصحابي مبتشتكيش من موضوع الزوجة التانيه ليه
باب النقاش مفتوح ولو سمحتو يا انجل وماتادور متحذفوش حاجة
وشكرا

حلو قوي الموضوع ده وانا عرفة اننا كلنا البنات اللي متجوزوش مشكلتهم ان العرض المتاحة ادامهم الزوجة التانيه واللي هيخلينا نعنس ان شاء الله عشان الواحد لايمكن يبنى سعادتة على تعاسة واحده تانيه
بس الموضوع ايه اسبابه معرفش
ويتحل ازاي برضه معرفش يمكن يتحل لما كل واحد ياخد باله من دينه اكتر ويبطل يبص للدين من بره

عزيزتى الملكه
كل رجل منا يحتاج الى اربعه نساء فى حياته.
1- الام (وهى التى يرتاح اليها وينام بين يديها ويحس بالامان معها)
2-الزوجه (ست البيت) وهى التى تطبخ وتغسل وتربى الاولاد و.......
3-الصديقه (وهى التى يستطيع ان يتحاور معها ويأخذ رايها فى امور حياته وحتى يناقشها فى الامور العامه
4- الحبيبه او الخليله (وهى التى ينسى الدنيا بمجرد الجلوس اليها وتستطيع ان يجعله لا يفكر فى اى شئ سواها وهى معه ويتمنى ان لاتغيب عن نظره لجمالها ورقتها و........
والمراه العاقله سيدتى هى التى تستطيع ان تجمع كل هؤلاء النساء فى سيده واحده .
ولكن الذى يحدث بعد الزواج ان المرأه تنسى كل شئ ولا تتذكر سوى سيده البيت ولا تهتم باى شئ حتى بنفسها وتظن ان الزواج والفوز بالزوج هو نهايه الدنيا وليس بدايتها.
لذا يحتاج الرجل ويبحث دائما عن الزوجه الثانيه وحتى الثالثه التى يجد فيها المواصفات المطلوبه
عرفتى سيدتى لماذا نبحث دائما عن الزوجه الثانيه

حلو الموضوع جدا يا مليكة واحييكي عليه ... اصل الموضوع ده واجع دماغ كل الستات المصرية والعربيه..وكل راجل بيفتكر نفسة هاورن الرشيد اللي المفروض يحصل على كل حاجة .. واحده وتنين وتلاته واربعة .. وظيفتة في الحياه علشان يستمتع .. ربنا خلقة علشان يتباها بنفسة وبنوعة ..
مع ان فيه ستات كتير تستاهل ضرب الرصاص .. لانها بتخلي اليأس يتحكم فيها .. وتخلي كلام الاستاذ اللي لا يجيد شيء في حياته الا الانتقاد واظهار الفوارق بينها وبين النساء الاخريات ..
وعلى حساب ان الراجل بيبحث عن كل الحاجات دي اللي هي الظاهرية واللي تخلي سعدته يتجوز تسعتلاف مرة .. لانه بيدور على الكمال او بيبرر الجري ورا المستحيل ...
طبعا اتضايقتم ...خلوني اقولكم القصة من الاول ..
الست بعد الجواز والخلفة بيجيلها قرفة وده اللي الراجل مش ممكن يحس بيه ولا يعرفة .. محتاجة الرومانسية الساحرة علشان تحسسها انها انثى تاني .. الست تركن شويه .. الراجل يركن شويتين ..
تعالو نشوف الراجل عامل ايه في بيته .. سي السيد..
مابيعملش حاجة غير الضغط على اعصاب اللي معاه انها اصبحت قرد مسلسل.. وده احساس صحيح .. ولما تبدا المقارانات انتي مش زي فلانة ولا تركانه تكتأب اكتر .. ويتكون جواها عند انها عمرها ما هتوصل لربع فلانه اللي الظروف مسعداها .. ومن العند اللي جواها يتولد نفور ومن النفور يتولد غضب من الراجل
السؤال هو
هل انت الان ديلون مثلا او حد محصلش في الشياكة والنضافة والتعامل الامثل ؟
هل كل اللي هي محتاجاه هو الكام ملطوش اللي بتديهم لها كل شهر
انتت عارف هي شايله فوق راسها قد ايه؟

طبعا هذا ليس عزاء للسيدات ..
انا دائما مقتنعة ان ربنا خلقنا امهر واذكي وافهم واتقن علشان الخلطة دي كلها تخليكي قادرة تماما انك تكوني احن واحكم ام لولادك وزوجك وتكوني انضف اكتر زوجة منظمة ومدبرة .. وتكوني منطلقة ومرحة وذات الراي الصائب مع اولادك وزوجك .. وتكوني انت انت ... فلانه .. اللي حيت فلان اول يوم قلك فيه بحبك وصباح الخير يا قلبي ( لو مقالش فدي سمة معظم الرجال عادي ) او اول مرة بصلك وعنيه مليها الاعجاب والاشراق ..

لازم تفتكري ان هو فلان .. للي انا فتحت عنيه ولقيتة.ز واللي معرفش غيرة
انا وهو مع بعض للابد .. يا اخليها كلها ضلمة .. يا اخليها احلي سنسن تمر علينا احنا الاتنين ...

وماينفعش طرف واحد هو اللي يبتدي .. لان الفشل محقق .. لازم هما الاتنين يقعدوا مع بعض .. وعارفة انهم هيتخنقم ... بس لازم هو يفهمها انها اجمل واعقل واظرف واقيم انسانه في الوجو وانه مش شايف غيرها ..
صدقوني .. الست بتيجي بحاجات بسيطة جدا .. لان ربنا خلقها من العاطفة ..

اسفة اني طولت عليكم بس كان نفسي كل راجل يحس ان الست اللي معاه نصيبة وحبيبته ولازم يقدرها
والست تحس ان الراجل اللي معاها هبه من السما لانه الحمايه والامان والقوة وراحة البال

ahmad55 كتب:عزيزتى الملكه
كل رجل منا يحتاج الى اربعه نساء فى حياته.
1- الام (وهى التى يرتاح اليها وينام بين يديها ويحس بالامان معها)
2-الزوجه (ست البيت) وهى التى تطبخ وتغسل وتربى الاولاد و.......
3-الصديقه (وهى التى يستطيع ان يتحاور معها ويأخذ رايها فى امور حياته وحتى يناقشها فى الامور العامه
4- الحبيبه او الخليله (وهى التى ينسى الدنيا بمجرد الجلوس اليها وتستطيع ان يجعله لا يفكر فى اى شئ سواها وهى معه ويتمنى ان لاتغيب عن نظره لجمالها ورقتها و........
والمراه العاقله سيدتى هى التى تستطيع ان تجمع كل هؤلاء النساء فى سيده واحده .
ولكن الذى يحدث بعد الزواج ان المرأه تنسى كل شئ ولا تتذكر سوى سيده البيت ولا تهتم باى شئ حتى بنفسها وتظن ان الزواج والفوز بالزوج هو نهايه الدنيا وليس بدايتها.
لذا يحتاج الرجل ويبحث دائما عن الزوجه الثانيه وحتى الثالثه التى يجد فيها المواصفات المطلوبه
عرفتى سيدتى لماذا نبحث دائما عن الزوجه الثانيه

انا اختلف معاك ياحمد لان الراجل لازم يبص لنفسة الاول - احنا مليانين عيوب كتير وقبل متحكمها حاكم نفسك .

ومعتقدش ان دة السبب الي خلا ربنا سبحانة و تعالي يحلل للراجل الجواز تاني - اديها حقها الاول و بعدين دور علي حقق.

انا شايف ان الحل هوا الرجوع للدين لاكثر ولا اقل.

بشكرك يا ماتدور على الكلام الي بينم على عقليه كبيرة متفهمة واشكر مكان استاذ زياد واللي عقة على الويب سايت بتاعتنا على الفيس بوك مشكور


واحمد 55 انا مش مقتنعة بكلامك واسمحلي الله يكون في عونها مامة الاولاد
يمكن انا متجوزتش لاني خايفة ان جوزي يبقى دماغة بالطريقة دي
والحمد لله ربنا وراني ان الدنيا لسه بخير
انا مش معترضة على رايك كل واحد يفكر زي ماهو عايز بس انا مش موافقاك
شكرا على المرور يا احمد 55

يااستاذ احمد55 هو انتو مش بتقولو ان الشرع محلل لكم الزواج طيب هو الشرع برده بيقول تصاحب ولا كل واحد بياخد اللى يعجبه من الشرع ويسيب اللى مش عجبه وقال الله عز وجل " ادخلو فى السلم كافه"وعلى فكره اساس الزواج الثانى العدل بين الزوجات وبصراحه واضح من كلامك ان الزوجه الاولى هتكون مظلومه الاختلاف فى الرأى لا يفسد للود قضيه

يا عم دول عالم مبيحواش فيهم
ناول طور ياولوا احلبوه مانا اولتلكو ان الزواج نظام فاشل يا فاشلين ياللي اتجوزتو
اشربو باى اذا كانو بيتخنقو مع الرجاله على المنتديات تفتكر عالياتهم ايه في البيت
مافيش احلى من العزوبيه ههههه

ايوه معاك حق برافو عليك ياريت متغيرش رأيك

عمري ماهغير رايي هي العمر بعزقه

مع احترامى لكل الاراء والموضوع اللى طرحاه مليكة بجد موضوع مهم جدا على فكرة انا شايفه ان احمد عنده حق ومليكة عندها حق بس كل بوجه نظره كلا تبع جنسه سواء بصفة الانثى او بصفته كرجل الحل بجد وانا اتفق مع احمد فيه ان الزوجه تبقى الاربعه اللى قال عليهم احمد ولاتهمل زوجها وساعتها هيكون بجد طوع بنانها وبرضوا مش معنى كدا ان مليكه كلامها خطأ وكل الستات وحشين وزى ما فى راجل وحش فى ست وحشه بجد وتستاهل ان الزوج يتزوج عليها وهنا بيت القصيد بمعنى اصح ناخد اللى قالته مليكة واللى قاله احمد ونخرج منه ان لازم يكون فى رضا وعداله بين الطرفين وكلا منهم يعمل لارضاء الاخر اما بالنسبه لموضوع وجود الاطفال وانصراف الزوجة فانى بجد اطالب كل زوجة ان تكون حكيمة بتعامل بين زوجها واولادها وتستخدم ذكائها الانثوى حتى لاتترك فراغ للزوج يجعله ينظر لزوجة تانيه ويارب ما اكون حالمة بس انا بجد نفسى تكون دى الحياة الزوجيه
اما بالنسبه للبنات اللائى يتزوجن من ازواج لديهم اطفال ولا يدركون معنى هدم بيت اخر فهم من ليس لديهم هدف غير انهم يرديدون الزواج فقط بحجة تأخير الزواج وانى اعتبرها سورى شماعة
وشكرا ليكم

انتم لسه بتفكرو بلرومانسيه رايك كويس يا ست نيز بس المهم ان الراجل اصلا عينه زايغة وصدق المرحوم احمد زكي امراه واحده لا تكفي يا قلبي

عايزة اقولكو ان مفيش ست مصريه او عربيه ومبتعنيش من القرف ده
حاجة توجع القلب
وعمر ما الراجل هيرضى ابدا ابدا

شكرا على كل الردود
ولكن طالما الدفاع عن الجنس يكون باى طريقه مجرد ان هذا رجل ويدافع عن نفسه تجد ان هناك نئات السيدات يدافعن عن جنسهن فلن يكون هناك حلول ابدا
(ملكه لا افهم ما تقصدين بكلامك هو الشرع بيقولك تصاحب تقصدى ايه)

سيداتى اخيرا اقول لكن هذه النصيحه الغاليه
كونى له امة يكن لك عبدا
يارب تفهموا انا زهقت

احمد انت فهمت ايه من كلامى كلا يدافع عن جنسه ؟ وعلى انا موافقه على مبدأك ايه بقى اللى مش فاهمينوا من وجهة نظر سيادتك لان من الواضح انك معصب ومتشدد ومش محايد فاريت تفهمنى انت زهقت من ايه لانى بجد مش عارفه انت عايز ايه غير اللى انا وافقتك فيه ووافت مليكة فيه انا كنت حيادية جداجد

ابوعلى انا بشكرك على ردك عليا بس الرومانسية مش عيب وياريت تبطل تثبيط فى مشاعر الاخرين سيب المشاعر تحدد حتى لو جزء بسيط بحياتنا احنا مش الالات ماشيه على الارض

عزيزتى nezz شكرا على ردك وعلى اتفاقك معى فى كثير من المواضيع انا ردى كان على دودى وملكه لانهم بيدافعوا وخلاص بدون تحليل للامور
صدقينى لست متعصبا ولا متشددا ومستعد اعترف بخطئى لو كنت مخطئ لاننى اؤمن بان الرجوع للحق فضيله
ومستعد احكم على نفسى لغيرى ان كان له الحق فلست غير محايد ولكنى زهقت من اى حد بيدافع عن جنسه وخلاص سواء رجل او امراة
يجب ان نحكم على الامور بالعقل وليس بالعاطفه
مره اخرى شكرا لك ويسعدنى اتفاقك معى فى كثير من الامور

شكرا ليك يا احمد على ردك على وانت على راسى يا بيييييييييييييييييييك وانت عارف بجد ان ارائك بتعجنى لان بحس فيها انها وسطيه ومرضيه عفوا انا ممكن فهمت خطأ لانى كنت بتكلم عن طبيعه الراجل وطبيعة الست اختلك عليا الامر شكر ليك

مش كل الناس عى فكرة يا احمد بتدافع وخلاص في ناس بتتكلم صح بس الناس مابتبطلش خناء
ويا نيز رايك كويس بس ماتزعليش منى انت انسه ومش متخيله يعني ايه الاعباء الزوجيه من كافة الاتجاها وخصوصا بقى لما تكون الست بتشتغل يا جماعة والله كارثة
يعني احنا بنجاول على اد مانقدر نتجنب ان الزوق يزعل او يشتكي بس الوحد فعلا من اللهو شايله هينفجر يعني انت مش عارفة الست الي قدامك دي كام مرة بتخش تعيط ولا حد حاسس بيها مع ان الكل بيشوفها يكول هي جامده كدة ليه
الله يخليكو حبه تقدير من الطرفين

والله يا شعنونه انا مقدرة وفاهمة بجد يعنى ايه زوجة بتشتغل ومعاها مسئوليه بيت اولاد وزوج وانا مش زعلانه والله من رأيك بالعكس رغم انى انسة بس والله عاملة زى المتزوجة شايلة مسئوليه وحاسه معانها والله يكون بعونك حبيبتى وويسر ليكى الصعب امين يارب العالمين

اه والله يا شعنن .. دا الواحد هيولع والله طيب لوسبنا العيال معاهم ساعة يتنرفزو ويزعقوا وميبقوش عايزين يتكلمو ايش حال احنا .. لنا الله

عزيزتى المحترمه nezz شكرا لردك وتقديرك عزيزتى شعنونه
انا عارف والله ان الست بتتعب فى البيت والاولاد دولا لوحدهم حكايه بس لازم تعرفى ان دى الطبيعه الى ربنا خلقهم عليها ان هما يقدروا يعملو اشياء مع الاولاد الراجل بصراحه ميقدرش يعملها بس لازم برده تعرفو ان هموم الراجل فى شغله وتوفير حياه كريمه لاسرته والدفاع عنهم وحمايتهم برده مش قليله.

والله العظيم الضغوط العصبيه فى الشغل كبيره جداااااااااااااا ربنا معانا

هوا دة الرد يامعلم 100 100 ياحمد

شكلك يا ماتادور ويا م/ احمد هتعملو حزي ضدنا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

حلو اوى الموضوع ده

بس فى نقطه مهمه جدا و هى ان الموضوع ده شرعا حلال


و قد ذكر الله_سبحانه وتعال_ فى سورة النساء (فَإِنْ خِفْتُمْ أَلاَّ تَعْدِلُواْ فَوَاحِدَةً) النساء 3
وفى الآية 129 يقول (وَلَن تَسْتَطِيعُواْ أَن تَعْدِلُواْ بَيْنَ النِّسَاء وَلَوْ حَرَصْتُمْ) النساء 129

بمعنى ان من يتزج مره ثانيه لن يستطيع ان يعدل بينهم وفى هذا اثم عليه

و العدل بينهم مش بس فى الانفاق لكن فى كل حاجه تانيه من رعايه واهتمام وخلافه

لكن الفكره انه عندنا كشعب شرقى ليه عاداته وتقايده الموضوع ده تعتبره المراه مهين لها و لكرامتها واقلال من حقها و انها مش دى الطريقه اللى يرد بيها الجميل ليها

واكبر دليل على كده ان فى ستات بتكون كارهه ازواجها و مش طايقاه و نفسها يفرمه قطر اول مايخرج من البيت بس انه يتجوز عليها لأ

بس بيتهيالى ان اللى بيعمل كده بيدى لنفسه اعذار بان الحياه معاها ممله و انها هى اللى غلطانه فى كل حاجه و انه لازم يجرب و يتجوز واحده تانيه

بس انا متاكد ان تسعين فى الميه من اللى عملو كده بيضربو نفسهم بالجزمه انهم عملو كده

اما العشره فى الميه الباقيه بيكون عنده طفاسه و مايملاش عينه غير التراب مش اكتر من كده

ف اللى تدى لجوزها الفرصه انه يفكر يتجوز واحده تانيه تحاول تغير من نفسها و تصلح من عيوبها من غير مكابره لانها بكده بتحافظ على بيتها

و اللى بيحاول يخلق لنفسه اعذار علشان يتجوز تانى انصحه انه يعقل و يراجع نفسه قبل ما يشدوه على السرايا الصفرا او يصاب بانفصام فى الشخصيه

اناموافقاك ياشادى
الراجل له اربعه بس لو كان الاولى فيها عيب يبقى ربنا مصرحله بالتانيه
لكن فى رجاله زي منتا بتقول عينها فارغه
ربنا يكفينا شرهم ويبعدنا عنهم
وفعلا طالما الاولى شايفه طلبات جوزها وبيتها يبقى عمره ماهيقدر يبص بره ابدا
الا ادا كان هوه الحاج متولى ..
وانا بقوله اتقى الله يجعل لك مخرجا
ويباركلك ف مراتك وولادك
وحسنه قليله تمنع بلاوى كتيره